Тамос

Телефони алоқаи таъҷилӣ: 3040

Нотариати давлатӣ

 

Фаъолияти нотариусони давлатии Ҷумҳурии Тоҷикистон

Мутобиқи моддаи 14 Конститутсияи (Сарқонуни) Ҷумҳурии Тоҷикистон ҳимояи ҳуқуқу озодиҳои инсон ва шаҳрванд дар Ҷумҳурии Тоҷикистон аз тарафи давлат кафолат дода мешавад. Ба ин васила давлат ба зиммаи худ уҳдадорӣ мегирад, ки механизми ҳифзи ҳуқуқ ва озодиҳои инсон ва шаҳрвандро муайян намояд. Ҳамин тавр, давлат низоми мақоми ҳифзи ҳуқуқро ташкил дода, ба зиммаи он ҳифзи ҳуқуқ ва манфиатҳои қонунии инсон, шаҳрванд ва давлатро мегузорад. Низоми нотариат низ дар Ҷумҳурии Тоҷикистон муҳофизати ҳуқуқ ва манфиатҳои қонунии инсон, шахси ҳуқуқӣ ва давлатро бо роҳи ба ҷо овардани амалиёти нотариалӣ таъмин менамояд ва ҷои махсусро дар муносибатҳои гражданӣ ишѓол менамояд.

Идораҳои нотариалии давлатии Ҷумҳурии Тоҷикистон  дар асоси Конститутсияи  (Сарқонуни) Ҷумҳурии Тоҷикистон, Қонуни Ҷумҳурии Тоҷикистон «Дар бораи нотариати давлатӣ» ва дигар санадҳои меъёрии ҳуқуқии Ҷумҳурии Тоҷикистон, инчунин санадҳои  ҳуқуқии байналмилалие, ки Тоҷикистон онҳоро  эътироф намудааст, фаъолият мекунад.

Тибқи моддаи 6 Қонуни Ҷумҳурии Тоҷикистон «Дар бораи нотариати давлатӣ» вазифаҳои нотариуси давлатӣ иборат аз таъмини ҳифзи ҳуқуқ ва манфиатҳои қонунии шахсони воқеӣ ва ҳуқуқӣ, инчунин манфиатҳои давлат бо роҳи ба ҷо овардани амалиёти нотариалӣ аз номи Ҷумҳурии Тоҷикистон мебошанд.

Фаъолияти нотариалӣ дар асоси принсипҳои қонуният, мустақилият, махфӣ будани амалиёти нотариалӣ анҷом дода мешавад.

Як қатор ҳуқуқ ва амалҳо бо тартиби нотариалӣ тасдиқ карда мешавад. Шахсони дурандеш ба нотариус дар ҳолатҳое низ муроҷиат мекунанд, ки ҳатто агар аҳд тасдиқи нотариалиро талаб накунад, зеро ҳуҷҷатҳои бо тартиби нотариалӣ тасдиқшуда қувваи собитнокӣ ва оммавиро дорад. То тасдиқ кардани ҳуҷҷати тасдиқшаванда, нотариуси давлатӣ ба тарафҳо ҳуқуқ ва уҳдадории тарафҳоро фаҳмонида, аз оқибатҳои он огоҳ месозад.

Ҳуҷҷати нотариалӣ бояд пурра бо қонунгузории Ҷумҳурии Тоҷикистон мутобиқ бошад.

Намудҳои амалиётҳои нотариалӣ:

- аҳдҳо (шартномаҳо, васиятномаҳо, ваколатномаҳо, уҳдадориҳо ва дигар аҳдҳо)-ро тасдиқ мекунанд;

- васиятномаҳои махфиро қабул ва эълон менамоянд;

- ваколати иҷрокунандаи васиятномаро тасдиқ менамоянд;

- барои ҳифзи молу мулки меросӣ чораҳо меандешанд;

- шаҳодатномаҳои ҳуқуқ ба мерос медиҳанд;

- шаҳодатномаҳои ҳуқуқи моликиятро ба ҳиссаи молу мулки муштараки зану шавҳар медиҳанд;

- дурустии нусхаи ҳуҷҷатҳо ва иқтибоси аз онҳо гирифташударо тасдиқ менамоянд;

- аз соҳибӣ соқит кардани молу мулки ѓайриманқулро манъ ва бекор мекунанд;

- аслияти имзоҳои дар ҳуҷҷатҳо гузошташударо тасдиқ мекунанд;

- дурустии тарҷумаи ҳуҷҷатҳоро аз як забон ба забони дигар тасдиқ мекунанд;

- воқеияти дар ҳаёт ё дар ҷойи муайян будани шахсро  тасдиқ мекунанд;

- айнияти шахсро бо шахси дар сурат аксёфта тасдиқ менамоянд;

- вақти пешниҳод намудани ҳуҷҷатҳоро тасдиқ мекунанд;

- аризаи шахсони воқеӣ ва ҳуқуқиро  ба  дигар  шахсони  воқеӣ ва ҳуқуқӣ месупоранд;

- маблаѓи пулӣ ва коѓазҳои қиматнокро ба амонат  (депозит) қабул мекунанд;

- навиштаҷоти иҷроияро ба ҷо меоваранд;

- эътирозҳоро оид ба векселҳо ба ҷо меоваранд;

- чекҳоро барои пардохт пешниҳод мекунанд ва напардохтани чекҳоро тасдиқ менамоянд;

- ҳуҷҷатҳоро барои маҳфуз доштан қабул мекунанд;

- далелҳоро таъмин мекунанд;

- шаҳодатномаҳо дар бораи ҳуқуқи моликият медиҳанд;

- эътирозҳои баҳриро ба ҷо меоваранд;

- розигии зан ё шавҳарро вобаста ба аҳде, ки шакли  нотариалиро талаб мекунад, тасдиқ мекунанд.

Инчунин, қонунгузории Ҷумҳурии Тоҷикистон метавонад ба зиммаи нотариусҳои давлатӣ иҷрои дигар амалиёти нотариалиро вогузор намояд.

Барои гирифтани маълумоти бештар дар бораи фаъолияти нотариати давлатӣ ба сомонаи http://notariat.tj/tj/ гузаред.

 

Барои анҷом додани амалиётҳои нотариалӣ мутобиқи Қонуни Ҷумҳурии Тоҷикистон «Дар бораи боҷи давлатӣ» боҷи давлатӣ ба андозаи зерин ситонида мешавад.